Luar na Lubre
Luar na Lubre - 30 Aniversario
Historia Os pasos de Luar na Lubre

O Grupo

No ano 1986 nace LUAR NA LUBRE na cidade de A Coruña converténdose co paso dos anos e o seu teimoso traballo nunha das formacións máis prometedoras e referenciais da música feita na Galiza.

O traballo que desenrola a banda está enfocado dende a óptica de entender que a música é un dos factores culturais máis importantes para a afirmación do dereito á diferenza enriquecedora do pobo galego. O grupo pretende que na Galiza predomine a súa cultura aínda que non rexeita influenzas que melloren a súa proposta sen deturpar o carácter central do seu proxecto.

O proxecto baséase fundamentalmente nas músicas de raíces galegas polo que dedican especial atención ao estudo dos cancioneiros galegos así como ao traballo de campo que lles proporciona un fondo coñecemento sobre a realidade musical galega que tamén se revela determinante nas composicións propias.

Concertos e Mike Oldfield

Con Mike Oldfield

LUAR NA LUBRE é hoxe en día a banda máis internacional da Galiza así pois dende Palestina a Canadá e dende Arxentina a Alemaña levan percorrido parte do planeta levando a cultura e a música da nosa terra a través da súa proposta.

No ano 1992 coñeceron ao músico británico Mike Oldfield para o cal ofreceron un concerto privado nunha coñecida sala de concertos coruñesa. Dese improvisado concerto saiu unha amizade que aínda perdura e que se traduciu nunha relación que levou a Mike a facer unha versión de "O SON DO AR" composición de Bieito Romero, un dos temas máis emblemáticos de Luar Na Lubre e título do que no 1988 foi o seu primeiro L.P. Mike incluíuno no seu C.D. "Voyager" (1996) como tema 1.

Isto foi determinante na carreira de Luar Na Lubre sendo un gran impulso á súa proposta que medrou cando o propio Mike os convidou no 1999 a realizar a xira "Then & Now" por diferentes cidades do estado con grande éxito e confirmándose como grupo "revelación".


Recoñecementos e premios

Con Donal Lunny

O grupo leva vendidas máis de 300.000 copias dos seus traballos, sendo "Plenilunio" e "Cabo do mundo" discos de ouro consecutivos por superar as 50.000 copias vendidas.

Entre os premios e os recoñecementos recibidos destacamos os seguintes:

  • Premio Ideal ao mellor grupo de folk da Galiza outorgado polo diario "El ideal Gallego"
  • 2 premios Luar outorgados polo programa "LUAR" da TVG pola mellor traxectoria profesional e polo mellor tema galego.
  • 9 premios da música concedidos pola SGAE e pola "Academia de las artes y las ciencias de la música"
                     - 1 por Mellor Canción Novas músicas por "Tu Gitana".
                     - 1 por mellor álbum de Novas músicas por "Cabo do Mundo".
                     - 5 por mellor canción en galego:
                        - "Chove en Santiago"
                        - "Camariñas"
                        - "Devanceiros"
                        - "Hai un paraiso"
                        - "Canto de andar"
  • Premio á promoción cultural da cidade da Coruña outorgado pola Comisión de fogueiras de San Xoán.
  • Premio de Audiovisuais galegas "Mestre Mateo" pola música do seu D.V.D "Un bosque de músicas".
  • 2 por mellor álbum de música tradicional por "Camiños da fin da terra" e "Ao vivo"

Historia recente

Entre as xiras por Galiza, España e mundo, no ano 2004 e dirixida por Ignacio Vilar, LUAR NA LUBRE gravou o seu primeiro DVD onde se recolle parte da súa traxectoria e vivencias. Unha experiencia magnífica onde se combinan as paisaxes do noso país, a música do grupo e as anécdotas persoais de cada un dos seus membros.

Tras a estela de Ana Espinosa e Rosa Cedrón, chegou a doce e persoal voz da lisboeta Sara Vidal, que confirmou un aporte de frescura e nitidez á esta etapa da banda; coa que gravou, dende a súa incorporación no ano 2005, 4 CDs como vocalista: "Saudade", "Camiños da fin da terra", "Ao vivo" e "Solsticio".



2011 é o ano no que Luar Na Lubre celebra o seu XXV aniversario

No ano 2011 Luar Na Lubre é embaixador  musical  da súa terra  realizando máis de 35 concertos e levando a marca “Galicia” polos mellores teatros e festivais do estado cun éxito máis que notable.   

A banda reemprendeu unha nova xeira na que presentou por diversos escearios a Paula Rey, a nova voz que sustituíu á da lisboeta Sara Vidal. Unha voz carregada de matices e de enerxía que combinada coa riqueza instrumental i estilística da banda, non deixou indiferente a ninguén.


A coruñesa Belem Tajes, nova voz de Luar na Lubre na súa xira 30 aniversario

Belém Tajes

Belém Tajes (Bos Aires 1985) é cantante e compositora e especialista en musicoterapia. Foi vocalista de varias forrmacións como VooDoo e Sisters in the House. Comezou a súa andaina musical no ámbito da música tradicional, posteriormente pasou polo Conservatorio da Coruña e Carballo, e varias escolas de música de Santiago e Coruña.

Comprometida desde sempre coa cultura galega, Tajes realizou un proxecto no 2016 como parte de Tosta Cultural Cargo, un programa de intercambio lingüístico e cultural entre nacións con linguas minorizadas. Isto levouna cinco semanas a Irlanda, onde traballou na creación dun cancioneiro de melodías en gaélico e galego relacionadas co mar, vista a conexión dos dous pobos mariñeiros co caladeiro do Gran Sol.

O 28 de xaneiro de 2017 participaba en Compostela como convidada no inicio da xira de 30 aniversario cun concerto moi especial no que se colgou o cartel de “Entradas esgotadas” e no que contaron con tres convidados de excepción, ademais de Tajes: o cantautor Ismael Serrano, a Coral Ruada e Irene Cerqueiro.  

Luar Na Lubre, unha das bandas de referencia da música folk do noso país, celebra a súa longa traxectoria cun dobre CD recopilatorio, con 15 temas cada un. Non é un recopilatorio tradicional, senón que vai máis alá e aporta unha colección diferente de temas "escondidos", de tesouros "non habituais" pero non por iso menos sorprendentes que os seus grandes clásicos.  

Luar Na Lubre foi premiada en numerosas ocasións con recoñecementos tanto a nivel galego e local, como a nivel estatal, con nove Premios da Música concedidos pola "Academia de las Artes y de la Música" ou cos dous discos de ouro por dous dos seus traballos ao superar as 50.000 copias vendidas en cada un de eles. O primeiro deses discos (Plenilunio) foi entregado por Mike Oldfield na súa casa de Londres.

É neste 30 Aniversario cando a banda decide sacar este novo CD de celebración e reafirmación, xa que non é un recopilatorio tradicional, senón que vai máis alá e aporta unha colección diferente de temas "escondidos", de tesouros "non habituais" pero non por iso menos sorprendentes que os clásicos xa recoñecidos. E aí está a maxia precisamente, na capacidade de sorprender con músicas que forman parte desa traxectoria antes comentada, que brillan con luz propia e que albergan a sosegada tranquilidade que da o tempo.   

Unha das sorpresas deste CD é unha versión do mítico tema "Fonte do Araño", composta polo músico e creador galego Emilio Cao, considerado un dos mestres e guía do espírito da música de Luar Na Lubre; con unha visión diferente da orixinal pero que garda as esencias fundamentais da que compoñeu o autor. A colaboración de Ismael Serrano á voz, Nani García nos teclados e a Coral de Ruada nos coros, converten o tema nunha alquimia de sonoridades. 

Outras novidades dentro deste recopilatorio/celebración de XXX Aniversario son as versións actualizadas de tres temas, xa gravados anteriormente en sendos traballos, como a clásica irlandesa "Morrison's jig" da que o grupo fixo unha nova versión diferente coa forza de novos arranxos e a brillante colaboración do magnífico acordeonista galego Víctor Iglesias, o "O soldado desgraciado” con arranxos renovados e con nova sonoridade grazas ás posibilidades técnicas actuais, tamén “Dun tempo para sempre", unha fermosa melodía feita sobre un poema inspirado na cultura celta. 


Un disco para celebrar a vida, que gustará aos incondicionais do grupo e que tamén atraerá a atención de aqueles que queiran achegarse a coñecer mellor o universo da música folk e tradicional. 

E así, os anos van pasando de proxecto en proxecto, de concerto en concerto, e Luar Na Lubre continúa o seu camiño, facendo historia despaciño e con calma, formando parte da banda sonora de moitas vidas e tendo a capacidade de emocionar e de continuar avanzando en tempos convulsos e difíciles pero abertos á esperanza e a ilusión. 




Luar na Lubre son: 
 Bieito Romero (gaitas, acordeón e zanfona)
Belém Tajes (voz)Antía Ameixeiras (violín)
Patxi Bermúdez (Bodhran, tambor, djembé)
Pedro Valero (guitarra acústica)
Xavier Ferreiro (percusión latina, efectos)
Xan Cerqueiro (frautas)

XIRA 2016

  • 08 de xaneiro: VIGO
  • 09 de xaneiro: A CORUÑA
  • 12 de febreiro: LEON
  • 13 de febreiro: TOLEDO
  • 26 de febreiro: BARCELONA
  • 27 de febreiro: BANYOLES
  • 6 de marzo: ARZUA
  • 11 de marzo: SALAMANCA
  • 12 de marzo: BARAÑAIN
  • 17 de marzo: BRIE, Francia
  • 28 de marzo: AVILES
  • 6 de maio: YECLA
  • 13 de maio: CADIZ
  • 14 de maio: AVILA
  • 26 de maio: MADRID
  • 29 de maio: PONTEAREAS
  • 03 de xuño: LAGUNA DE DUERO
  • 23 de xuño: ALCALA
  • 01 de xullo: MUIÑOS
  • 02 de xullo: TORO
  • 16 de xullo: BALBOA
  • 24 de xullo: PORTUGAL
  • 29 de xullo: CARRIZO
  • 30 de xullo: AYLLON
  • 06 de agosto: ZAS
  • 20 de agosto: NEGREIRA
  • 25 de agosto: POIO
  • 23 de setembro: MANRESA
  • 24 de setembro: XATIBA
  • 14 de outubro: BILBAO
  • 29 de outubro: ARTEIXO
  • 11 de decembro: MEDINA DEL CAMPO
  • 16 de decembro: ZAMORA
  • 28 de decembro: VITORIA

XIRA 2015

  • 16 de xaneiro: VITORIA
  • 17 de xaneiro: PAMPLONA
  • 20 de febreiro: MATARO
  • 10 de abril: GIJON
  • 11 de abril: SANTANDER
  • 17 de abril: ZARAGOZA
  • 11 de xuño: BILBAO
  • 12 de xuño: LLEIDA
  • 13 de xuño: VALENCIA
  • 20 de xuño: CARBALLO
  • 09 de xullo: VALLADOLID
  • 10 de xullo: CARTAGENA
  • 11 de xullo: LA CABRERA
  • 01 de agosto: ZAS
  • 02 de agosto: GIRONA
  • 05 de agosto: OCHAGAVIA
  • 21 de agosto: BENALMADENA
  • 22 de agosto: MILAGROS
  • 17 de setembro: CARBALLIÑO
  • 19 de setembro: MURCIA
  • 10 de outubro: SANTO DOMINGO
  • 11 de outubro: LUGO
  • 05 de novembro: MADRID
  • 28 de novembro: EL VENDRELL
  • 11 de decembro: OURENSE
  • 18 de decembro: TUDELA
  • 19 e 20 de decembro: ALCALA DE HENARES

Aviso legal © by Abertal